خطة المخزن (أمل صقر ومسلم) باش الشعب يتلهى فالفضائح وينسى شنو كاين فالواقع ....

 القانون اللي ماتوا عليه الناس قبلنا باش ميتنفذش، تمت المصادقة عليه بلا خبارنا فالوقت لي الشعب المغربي ملهي مع فيديوات الفضائح والجرائم لي تسربات بسرعة وبشكل مفاجئ، حكومة سعد الدين العثماني حسي مسي وبدون سابق إنذار قدمات قانون الإطار 51.17 بعد مشاورات مراطونية بين المجلس الأعلى للتعليم والبرلمان لي صادقو عليه وغدي يتعرض على الملك فالمجلس الوزاري باش يأشر عليه. 


 قانون الإطار 51.17 هو قانون متعلق بمنظومة التربية والتعليم والتكوين والبحث العلمي غدي يحكم المنظومة حتى لسنة 2030 ، فيه 10 أبواب و57 مادة ، المادة 43 من هاد القانون كتقول بلي مجانية التعليم غتولي منحصرة فقط فالتعليم الإلزامي (الإبتدائي والإعدادي) بمعنى أن التعليم الثانوي والتعليم العالي ماشي إلزامي وغدي تولي الدولة ملزمة تقريك غير من التحضيري حتى لتاسعة ومن بعدها ضبر لراسك ، فالمادة 45 قال ليك إقرار مبدأ المساهمة فتمويل التعليم العالي والتعليم الثانوي ، هاد المساهة غدي  يخلصوها واليديك على شكل رسوم التسجيل ، يعني ميزي تقرا ماميزيتيش بقا فداركم وغدي يكون الهدر  المدرسي مصيرك ومتحلمش تفوت الإعدادي  .

 الحكومة بهاد القانون دارت بداية النهاية لمجانية التعليم وطبقات إملاءات البنك الدولي من بعد ما غرقات فالديون بسباب ناس يتسلفو ويخشيو فجيبهم والشعب يخلص. ودابا الدولة شرعات فتعزيز الخوصصة لي كتسرح بشويا بشويا حتى يدقو آخر مسمار فنعش المنظومة التعليمية، أما المغاربة في فلك آخر مقابلين فيديوات الإغتصابات والفضايح وناعسين على ودنيهم.